kavitha

യാത്രാമൊഴി

...........................

വിജയൻ രാജപുരം

ഇനിയീ പടിയിറങ്ങാം; പരിഭവമില്ലാ സഖേ ;

സഹയാത്രികർ; നമ്മൾ പിരിയും ഖേദം മാത്രം.

ഘനമീ ഭാണ്ഡം പേറി;

മണൽക്കാടുകൾ താണ്ടി;

ഒരുമിച്ചുറച്ചു നാം

പഥികർ; മുന്നേറവേ

മദമാത്സര്യം പൂണ്ടു;

കുതികാൽ വെട്ടാനാഞ്ഞ

വടിവാൾപ്പിടിയിലെ;

കരമായ്പ്പോയോ നീയും

ത്യജിക്കാം പരിഭവം

ത്യജിക്കാം പരിഭവം;

ഒരുവേളയി മണൽ

ക്കനൽച്ചൂളയിൽ; നമ്മൾ;

നമ്മൾ മാത്രമായ് ത്തീരാം

മറക്കാം പരിഹാസം മറക്കാം പരിഹാസം;

മൃദുഹാസവും പൂശി

ത്തൊടുത്ത കടുംവാക്കിൻ

ശരങ്ങൾ നീക്കാം; നിന്റെ

മുറിവിൽപ്പുരട്ടുവാ-

നെന്തു ഞാനേകും എന്റെ

ഹൃദയം പകുത്തെടു

ത്തുരയ്ക്കും വാക്കല്ലാതെ?!

നടന്നു തളർന്നേറെ

നടന്നു തളർന്നേറെ;

സഹയാത്രികരെല്ലാം

വഴി പിരിഞ്ഞു പോയ്;

കുളിരിൽ ലയിച്ചു പോയ്

കുളിരുകാണാതെ;

തളിരുകാണാതെ

വഴി പിഴച്ചുവോ; നമ്മൾ

വഴിയിൽ പിഴച്ചുവോ?

സമയമേറെയായ്; വഴിയിറങ്ങുക

തണലായ് നമ്മൾ തൻ

നിഴലുമില്ലാതെ

പതിതരായി നാം

ഏകരായ് നാം

നിഴൽ യുദ്ധത്തിലെ

എതിർപ്പോരാളികൾ !

ഇനി ഞാനിറങ്ങീടാം;

ഇനി ഞാനിറങ്ങീടാം;

പടികളേറെയു

ണ്ടതിലെൻ; വിയർപ്പുണ്ട്

വിണ്ടു പോയോരു പാദം പൊടിഞ്ഞെന്റെ

രുധിരമുണ്ടതിൽ; കണ്ണീർ നനവുണ്ട്.

ഇതെന്റെ യാത്രാമൊഴി

ഇതെന്റെ യാത്രാമൊഴി

പിൻവിളി കാതോർക്കാതെ

തിരികേ നടന്നീടാം.

എങ്കിലുമോർപ്പൂ തത്വം;

പ്രപഞ്ച തത്വം; സത്യം -

ഉയരങ്ങളിൽ നിന്നേ

വീഴാനുമാകൂ സഖേ.

ഇറങ്ങാമിനി

ഇറങ്ങാമിനി; പടി -

തിരത്തള്ളലിൽ കാ-

ലിടറും മുമ്പേ തന്നെ

പടിയിറങ്ങുമ്പോൾ; തൊടിയിറങ്ങുമ്പോൾ; കാ-

ലിടറുമെങ്കിലീ; കരം പിടിക്കുക

വഴിയേ വരുന്നോരേ

നന്മ നേരട്ടെ; യാത്ര

തുടരൂ, കരുത്തോടെ;

മംഗളം ഭവിക്കട്ടെ.

യാത്ര

തുടരൂ, കരുത്തോടെ;

മംഗളം ഭവിക്കട്ടെ.

 

 Home